政情：借調西九執爛攤 馮程淑儀下場難料
西九文化區管理局行政總裁栢志高提早喺今個月底離任，政府尋日終於宣布曾捲入「樓換樓」醜聞嘅政策創新與統籌辦事處總監馮程淑儀，下月7號起借調去西九管理局出任署理行政總裁，為期約半年。西九財政未來3年有39億財赤，外界憂慮變成海洋公園2.0，猶如無底深潭。馮程淑儀此時接手呢個爛攤子，唔知會唔會重蹈栢志高嘅下場。
早喺政府宣布消息前，政圈已經盛傳馮程淑儀係大熱人選，事關佢同西九極有淵源。同栢志高一樣，馮程淑儀都係政務官出身，1986年加入政務職系，曾任職多個政府部門，包括喺2009年至2014年出任康樂及文化事務署署長，及後喺2014年至2018年出任民政事務局常任秘書長，並以呢個身份成為西九管理局嘅民政局代表成員。當年喺處理西九文化區興建故宮文化博物館一事上，佢更加係「五人核心小組」一員。
管理局財政不堪入目
外界關注今次借調安排後，馮程淑儀會唔會「一去冇回頭」，離開政府坐正西九管理局CEO呢個位。其實好似馮程淑儀呢個級數嘅政府首長被借調去西九都唔係新鮮事，香港故宮文化博物館館長吳志華就已經係先例。吳喺2014年出任康文署副署長，2018年底被借調去故宮博物館出任館長，為期半年。雖然舊年3月吳已被調返康文署，但西九管理局就喺同年5月宣布，佢由8月初起出任故宮博物館館長。
之不過，西九管理局一向被視為燙手山芋，財政狀況又不堪入目，西九文化區唔少工程更係波折重重，而且超支情況嚴重。就好似政府喺十年前話西九文化區項目總工程預算係216億港元，但去到舊年單係一個綜合地庫工程，都要再申請近236億港元嘅額外撥款。早前西九管理局提交立法會嘅文件更預測未來3年，折舊前嘅營運赤字高達39億港元。
歷任CEO冇人坐得耐
睇返西九管理局歷任嘅CEO，好似都冇人坐得耐。馮程淑儀今次接手呢個爛攤子，唔知會好似吳志華咁平安無事，抑或成為「栢志高2.0」提早「被離職」，最終下場真係要拭目以待啦！
另外，備受爭議嘅故宮文化博物館尋日舉行平頂儀式，預計2022年中開館。不過，呢個項目係當年政府喺冇諮詢立法會同公眾嘅情況下，突然宣布同北京故宮博物館合作，並由馬會出資興建，惹嚟外界猛烈抨擊。目前距離博物館啟用仲有約兩年時間，究竟會唔會超支就要睇吓呢班管理層嘅手段啦。