中環出更：醫護罷工病人遲醫 陳肇始拒道歉

議員葛珮帆批評醫護以政治訴求凌駕專業承擔，罔顧病人福祉，關注罷工嘅員工會否受到懲處，同時希望政府有具體措施防止日後再有罷工行動。而另一議員容海恩就話有病人個案因而受到延誤，要求陳肇始同醫管局向病人道歉，再研究賠償方案，但佢就話相信「健康係用錢都買唔到」呀！

只重複數據 稱醫管局會跟進

陳肇始並冇應議員要求道歉，只係又講咗一堆數字出嚟，佢話醫管局就着員工罷工，總共接獲約7,000宗意見反映、求助或者投訴，當中有27宗涉及對個別病人嘅服務影響，醫管局正作跟進，會為病人同家屬提供適切援助。

佢又話上月初向有關員工發信，要求解釋缺勤原因，醫管局整理緊個別員工嘅回覆，將會參照法律意見、相關僱傭條例、僱傭合約以及人事規例，以合情、合理同合法方式作公平處理。罷工事件過咗咁耐，陳肇始只係重複又重複啲數字同埋話醫管局跟進緊，睇嚟係想拖得就拖，之但係班議員係唔會咁輕易放過佢o架！

卓妮