中環出更：聲好氣通 莫華倫唱歌健體抗新冠
疫苗一日未推出市面，新冠肺炎都係令人談虎色變。今年年初曾確診染疫嘅著名男高音歌唱家莫華倫，話今次疫情雖然未有特效藥物，但唔等於不治之症，只要及早就醫，就連年逾七旬嘅美國總統特朗普，只需短短幾日就告康復，可見「病向淺中醫」呢句說話真係無錯架。
儘管疫情肆虐全球，不過莫華倫認為新型冠狀病毒並唔可怕，只要唔係長期病患，以及喺隔離嘅環境中治療，染疫者嘅痊愈率其實係非常高。莫華倫又指自己所認識嘅外國歌唱家朋友，好多都中過招，有啲人嘅病情甚至較自己嚴重，但最終都徹底好番。莫華倫認為病毒一旦入侵身體，咁就好依靠個人嘅抵抗力。佢話平時除咗做Gym健身，練聲都係一個唔錯嘅做法，至於中國人運用丹田氣練聲，就對全身都有幫助，而當一個人聲好，自然就氣通，所以唱歌係有益健康嘅活動。而佢自己作為歌唱家，肺活量較大，染疫康復之後亦無俗稱「肺花」嘅後遺症。
李世傑：多聽音樂會振奮人心
莫華倫日前係為一個音樂會擔任表演嘉賓。香港中華廠商聯合會（廠商會）副會長徐晉暉、常務會董李慧芬同李世傑，都係當晚音樂會嘅座上客。早前因場地關閉，喜歡打網球嘅李世傑難以同波友較量，又冇得幫襯健身室，於是就改為添置健身器材，居家鍛煉體格。雖然好多人因疫情而陷於低谷，但李世傑認為呢個時候就更加要聽多啲音樂會以振奮人心。
至於當晚嘅音樂會，就係由廠商會前會長李秀恒一手促成。李秀恒話去年喺東非坐直升機拍攝雀鳥，腦海中就響起貝多芬嘅樂章，於是今年就邀請樂團與知名歌唱家演繹貝多芬嘅作品，以紀念貝多芬250周年誕辰。見盡野外動物弱肉強食嘅李秀恒話，野外動物就算強如猛獸，都無法確保自己能否免於飢寒，今日經濟環境受疫情衝擊，縱是弱勢社群都可受福利制度嘅保障，所以大家應對前景保持積極態度。
卓妮