中環出更：後生愛玩水上運動 馬清揚跟足教練保安全
常言道：「欺山莫欺水」，水上運動嘅危險性，絕對不宜低估。身兼東華三院董事局副主席、香港青年獎勵計劃營地管理委員會主席馬清揚，日前出席青年獎勵計劃起動禮，就大爆自己學生時代都有接觸獨木舟等各種水上運動，而玩得獨木舟，難免都試過反艇，自己所駕馭嘅獨木舟一旦反轉就要即刻閉氣o架！
馬清揚話當時係跟教練學游水，所以唔太擔心安全問題，就算依家仔女想嘗試水上活動都會放心畀佢哋玩，認為只要跟住正規嘅方法學習，一定會學到安全措施，咁就無有怕啦！而馬清揚最近想試吓嘅新運動，就係跳傘喇，佢早前同東華旗下學校嘅學生去新加坡遊學，嘗試喺室內模擬跳傘，覺得好新奇有趣，希望日後有機會都可以試吓玩。
青年獎勵計劃理事會副主席郭永亮（Andy）都有出席起動禮。Andy話佢以前有玩過賽艇，當時都有教練從旁教導，加上岸邊進行居多，所以都唔算好困難。佢話以前有玩過滑水，都容易跌親o架，不過細個心口一個勇字唔驚跌撞，反而係驚落水後會有水母喎。Andy又話依家較年長嘅兩位子女都懂得游水，最細3歲嗰個都準備學，佢仲笑稱既然自己教子女游水有難度，就點都要畀機會佢哋出去跟教練學啦。
李曠怡曾跌落水打穿耳膜
東華三院前總理李曠怡（Jason）以前都超級鍾意玩水上活動，仲要係刺激嗰種，形容自己玩得好癲o架，不過婚後就要修心養性。Jason指自己曾擁有一部水上電單車，每逢周末都會同一班朋友開船出海玩。有一次Jason同朋友各自駕駛船隻由香港仔前往大浪西灣，點知去到一半遇上一號風球，成個天烏雲密布，能見度又低，惟有冒住風雨回航。Jason亦都有玩wakeboard，之前佢挑戰花式時，唔小心跌落水打穿咗耳膜，好彩Jason依家無乜大礙，但以後要小心啊！
卓妮