政情：當選小組委員會主席 蔣麗芸多得泛民
話說立法會審議與預防及控制疾病相關的附屬法例小組委員會尋日召開會議，選舉正副主席。咦，之前唔係已經選咗o架咩？點解又選過嘅？咪就係因為泛民總辭囉！泛民議員辭職後都陸續退出所有委員會，建制派議員蔣麗芸（Ann）就順利當選委員會主席，呢個主席位失而復得，真係要多得泛民總辭喇！
曾不敵李國麟 總辭後重選
呢個小組委員會原本嘅主席係衞生服務界李國麟，副主席就係民主黨議員黃碧雲，兩個泛民議員都遞咗辭職信，因而正副主席都懸空。今日開會時議員邵家輝提名阿Ann擔任主席，金融界議員陳振英和議，喺無競爭嘅情況下，阿Ann就當選主席。
其實阿Ann同主席一職曾經失之交臂，皆因泛民總辭前的委員會，泛民嘅人數係多過建制派，而喺首次會議李國麟就擊敗阿Ann。
當時有個傳聞，話有關方面最初睇到小組委員會係清一色泛民，曾搵食物及衞生局官員去協調，當時邀請阿Ann選主席，有說食衞局局長陳肇始甩轆，最後連呢個小組委員會都係由泛民當道。