中環出更：公聽會變書面表達 周浩鼎捱批
立法會政制事務委員會原定喺尋日就聯合國人權事務委員會審議香港參照《公民權利和政治權利國際公約》提交嘅報告舉行公聽會。不過，委員會主席周浩鼎上周以疫情為由，決定改以書面形式接受公眾意見。呢個安排唔單止惹嚟有意出席公聽會嘅團體不滿，議員葉劉淑儀都狠批安排搞到佢哋「倒瀉籮蟹」。
周浩鼎喺會上話早前收到幾位委員來信，話因應疫情同冬季流感情況要考慮風險，希望可以取消公聽會，改以書面形式接受團體意見。佢話經慎重考慮後，決定邀請報名出席公聽會嘅人士以書面表達意見。
由於有關決定係喺開會前幾日先通知委員，引起在席委員不滿。身兼新民黨主席嘅葉劉淑儀批評改動太過突然，話早已安排黨員發言，依家又臨時改為收集書面意見，又更改會議時間，搞到大家「倒瀉籮蟹」，要求周浩鼎下次做相類決定時提早通知委員。非建制派議員鄭松泰亦都批評安排唔理想，認為會阻礙了民間團體向政府反映意見。
疫情為由 一刀切取消
面對班委員嘅批評，周浩鼎都只能夠死撐，話一有改動已按程序即刻通知委員，又話明白大家面對嘅問題嘅。
原本計劃出席公聽會嘅民權觀察創辦人沈偉男斥周浩鼎以疫情為由，一刀切取消公聽會並唔合理，要求委員會盡快重新安排公聽會，而香港人權監察就質疑現時立法機關如自行廢除自己嘅角色，又話即使唔能夠親身出席會議，委員會亦可以喺網上進行公聽會，直指「幼稚園都做到」。
卓妮