中環出更：工作忙易忽略家人 朱子穎帶埋阿仔返工
受到疫情影響，早前學校停課，學生要網上學習，本身係小學校長嘅十大傑青朱子穎認為無論成年人定小朋友都會覺得使用視像會議存在隔膜，但與其只着眼於不足之處，倒不如諗辦法，盡快克服問題。
朱子穎早前喺一個平台上做分享，話網上學習同樣有無數好處，並唔係只單純為咗彌補失去面授課堂嘅機會，佢間學校就容許學生喺日間隨時喺網上問老師問題，可以選擇錄音、留口訊、甚至同老師一對一進行視像通話。
喺爆發疫情期間，佢形容係人生中最忙嘅時間，最初計劃平均分配時間畀工作、社會同家人，點知因科技發展太發達，要不停開會商討工作，自覺忽略咗家人。佢就諗到個兩全其美嘅方法，就係每日都帶個仔去工作嘅辦公室，小朋友可以一邊玩一邊知道爸爸做緊啲咩，而佢亦可以抽時間陪伴小朋友。
最近因為爆發流感，幼稚園同幼兒中心停課兩星期，小朋友都係要網上學習。香港廣西社團總會副會長陳志豪育有兩子，大仔4歲半讀緊幼稚園，依家停課，而細仔只有10個月大。佢話早前疫下停課，都要諗吓幫啲小朋友「放電」，例如帶佢哋去跑步咁。佢仲話大仔就好鍾意睇書，嗰段時間睇咗幾百本書，對歷史好有興趣，有次仲發咗個口訊畀佢，問佢岳飛係邊個嚟添！
韋國洪孫女返學唔願走
早前喺一個公眾場合見到沙區議會前主席韋國洪亦分享咗兩個孫嘅趣事。佢話大孫女今年三歲，上緊學前班，孫女好鍾意上堂，話說大半年前小朋友仲可以返學校時，有一次佢同太太一齊接孫女放學，孫女竟然唔肯走發脾氣，上到車之後仲喊出嚟添！佢又話當年安排個仔讀中學時，本身想安排讀一間遠啲嘅中學，但最後決定幫個仔揀間屋企附近嘅，囝囝午飯仲可以返屋企，話方便照顧先最重要。
卓妮