劏房問題多多，唔止租金昂貴，衞生仲好惡劣。雖然政府半年前成立咗劏房租務管制研究工作小組，但一直備受批評，包括個工作小組度冇租戶代表。最近關注劏房嘅團體都提出唔少建議，例如設立執法部門監管業主濫收費用，仲希望政府盡快落實時間表推出租管，擔心又再有延後。其實劏房問題人盡皆知，工作小組主席梁永祥早前話委託咗機構做研究，難怪被批評嘥時間，又搞到遲交報告就弊喇！
