政情：陸頌雄：工友的浪漫 滷水牛腩飯

開估！係「滷水牛腩飯」。究竟呢碟碟頭飯有幾浪漫呢？話說勞工界議員陸頌雄日前喺社交平台上載咗一條短片，佢化身美食界KOL，影住自己食飯，同大家介紹晚餐——滷水牛腩飯。

加條菜提醒飲食要均衡

陸話牛腩飯平時成日食，多數會叫柱侯牛腩，而滷水牛腩就比較少見。佢一路食一路仔細咁評價食物嘅質素，話牛腩幾入味，滷水汁都唔算太鹹，雖然牛腩有少少肥，但肥嘅部分唔肥膩，入口即溶。見到碟飯入面有菜，佢講笑話條菜提醒佢飲食要均衡喎。

佢之後又讚飯煲得軟硬適中，例湯水準都屬中上o架，如果媽媽煲嘅湯有10分嘅話，嗰碗湯都有7分嘅，點都係屋企湯最好飲咁話喎。之後佢又同餐廳師傅傾偈，師傅謙虛咁自言食物麻麻哋啦，陸就讚師傅對食物要求咁高，食物質素一定愈做愈好喇！

話明「工友的浪漫」，咁當然係因為碟飯好味夠飽肚，仲要夠平啦！原來碟飯連例湯都只係38蚊，陸覺得非常抵食，仲話下次再同大家介紹啲抵食嘅地方小店喎。