政情：紓失業大軍靠增加培訓 羅致光好天真

疫情爆發咁耐，政府成日都話要「救經濟、保就業」，但作用似乎不大，近日唔單止有航空公司大裁員，又有旅行社要求全線員工停薪留職，畀人感覺「經濟愈救愈差、就業愈補愈漏」。唔知政府係咪慣咗亡羊補牢，羅致光尋日就喺網誌話，本港對安老服務一直有迫切需要，僱員再培訓局喺健康護理業試行嘅「先聘用、後培訓」試點計劃已經恒常化，鼓勵失業人士及潛在勞動力重投職場。佢仲話唔少安老服務機構都要「憑證上崗」，即請人時優先考慮曾接受培訓嘅員工，形容僱員再培訓局係安老服務嘅「人才引水道」。

缺工作崗位 讀完繼續失業

聽落好似唔錯，之不過本港7月至9月嘅失業人數已接近26萬人，今次就只有約4.6萬個與就業掛鈎嘅培訓學額，呢個數字相對於依家逼近26萬人嘅失業大軍，可謂杯水車薪。工聯會議員麥美娟（Alice）都狠批學額太少，根本係「治標唔治本」。佢又炮轟，政府成日有個錯覺，認為只要推出培訓課程，就可以解決失業問題，惟事實係幫助只有好少，擔心市場未必有足夠工作崗位容納佢哋，變相讀完書又重投失業大軍嘅行列。

議員促推個人失業援助金

Alice仲話，本港失業率攀升嘅情況已接近一年，認為政府若真係想幫失業人士，應該推出以個人為單位嘅失業援助金計劃，以解決佢哋嘅燃眉之急，並強調政府目前嘅失業綜援係以家庭為單位，申請門檻相對較高，所以係起唔到失業金嘅「應急錢」作用。

其實按目前市況推算，本港失業問題短期內未必會得到緩解，加上政府早前表明唔會再加碼「保就業」計劃，預計嚟緊可能再爆發新一輪裁員潮，如果政府覺得提供4.6萬個同就業掛鈎嘅培訓學額算係「做咗嘢」，小市民惟有自求多福喇。