中環出更：網上畢業禮 錢大康寄語浸大生 摒棄「我對你錯」思維
由於新冠肺炎疫情持續，有部分大學畢業禮都改為網上直播形式進行。浸會大學尋日舉行畢業禮，校長錢大康喺致詞時，就話依家個世界複雜又唔確定，好多人都欠缺「協作」呢項人格特質，又話要具備「協作」呢項人格特質，而「協作」係要學識欣賞同包容差異，需要摒棄「我對你錯」嘅思維模式。
指社會需「協作」 包容差異
有鑑於去年正值反修例示威風波不斷，唔少大學都取消畢業禮，浸大尋日就先幫上屆畢業生補辦畢業禮，今日先為今屆畢業生舉辦。話明係網上形式舉行，現場就冇觀眾，台上亦只有錢大康、副校長（教與學）周偉立、各學院院長等10幾名大學管理層。
就嚟退休嘅錢大康尋日係最後一次用校長身份出席浸大畢業禮，佢喺致詞時提到，話當年畢業時世界都有發生大事，而近年世界同樣都經歷緊巨變，舉例指美國就發動貿易戰、網絡戰等、中美關係邁向全面冷戰、各地都陸續爆發大型示威，包括美國「Black Lives Matter」（黑人的命也是命）運動、法國「黃背心」運動、香港反修例風波等。
雖然經歷咁多大事件，不過錢大康就對學生有信心，認為佢哋適應到，認為社會需要「協作」。佢仲勸勉學生，話協作即係欣賞同包容差異、同意見唔同嘅人交流，要摒棄「我對你錯」嘅思維模式，呼籲學生要記得「你的世界亦屬他們，而他們的世界亦無異於我們的世界」咁話。
卓妮