中環出更：疫境冇得返鄉下 林宣亮辦學心掛掛
新冠肺炎爆發近一年喇，受疫情影響，大家想要往返內地同香港，難免都要遵守檢疫限制，來回都要隔離，所以如非必要，都寧願等到疫情結束後先返鄉下探親。卓妮早前去咗個商會活動，個個都話好掛住啲鄉親，希望快啲通關。
喺活動上見到香港潮州商會（商會）永遠名譽會長林宣亮（Alfred），佢話父輩有喺揭陽鄉下起學校回饋家鄉，所以過往佢久唔久都會返鄉下視察吓學校嘅情況，探吓班小朋友咁，可惜今年因為疫情關係都返唔到去，只可以睇學校交嘅報告了解學校嘅情況，搞到佢都有啲心掛掛呀！
唔止咁，Alfred仲好掛住啲家鄉菜，仲話雖然每個地方都有差唔多嘅菜式，但鄉下嘅味道就只有家鄉啲捐窿捐罅嘅小菜館先食到。佢話如果遲啲通番關，佢都好想返去食家鄉美食，一解鄉愁咁話。
胡炎松祭祖靠睇直播
同場仲見到商會文化事務委員會主任胡炎松同永遠名譽會長胡劍江，胡炎松就話自疫情爆發以來就冇返過鄉下，仲因為咁而錯過咗祭祖，要家鄉僱用幫手睇屋嘅員工代行。雖然係咁，但聽佢講，員工代佢祭祖時，有開視像直播畀佢睇，都幾新奇得意咁話。不過，有得揀嘅話，佢就話「梗係想親身返去喇」。
話時話，受到疫情打擊，香港經濟陷於谷底，真係好傷，好多舖頭執笠，唔少市民仲飯碗不保，失業嘞！商會副會長鄭敬凱都話疫情影響兩地人流往來，希望可以快啲通關，方便兩地都有生意嘅人，回復正常嘅商業活動。
卓妮