中環出更：梁少玲：執好時間表 疫下家庭少摩擦
相見好，同住難，尤其是疫情之下深居簡出，同一屋簷下難免會起摩擦。基督教家庭服務中心助理總幹事（營運）梁少玲就教路，每位家庭成員都可按自己嘅作息習慣而制訂時間表，令到彼此都知悉對方喺唔同時間所做嘅事，互相協調之下好多爭執都得以避免。
梁少玲指出，早前唔少公司實施居家工作以及學校停課，父母同子女留喺屋企嘅時間大增，好多管教嘅問題都因而浮現；加上本港居住空間細，亦都增加摩擦機會。佢話自今年初疫情爆發後，中心處理嘅家庭摩擦、糾紛個案都有所上升。想減少出現爭執嘅場面，梁就認為，無論大人細路都可以制訂時間表，當大家都知道家中各人幾時工作、幾時休息，相信可減少家長質問子女「點解唔做功課、點解睇電視」等情況，避免子女有被管住嘅感覺。佢又提到，若果有需要亦可以搵社工幫手，有第三者畀意見同輔導，可以更容易搵到出路。
鄭雁婷：網上學習 家庭負擔重
梁少玲日前係出席蘇豪香港扶輪社捐助器材以協助該中心轄下嘅臻善軒，成立平板電腦實驗室嘅啟動儀式，同場除咗蘇豪香港扶輪社社長鄭雁婷同中心服務總監（青年服務）彭淑玲，賽馬會跳躍青年坊／臻善軒經理黃娟華同教育局政治助理施俊輝都有出席。講起教育問題，施俊輝話香港雖然實施15年免費教育，但去到大學階段，尤其係想去海外升學的話，對唔少家庭而言實屬沉重負擔。佢又憶起自己過往到美國讀書嘅經歴，話好感恩當時拎到獎學金，提到以往獎學金計劃較少，而且主要由私人提供，所以依家政府近年推出「卓越獎學金計劃」等，對學生而言都係好事。
而鄭雁婷就提到，依家嘅教學模式已有所改變，好多時學生都需要網上學習，但唔少低收入家庭未必能夠負擔得起相關嘅電子器材，所以該社就決定捐出35部平板電腦，希望幫助到有需要嘅學童。
卓妮