政情：涉掛不實仇警橫額 泛民區議員捱轟
現屆18區區議會當中，以民主派嘅區議員佔大多數。團體「議會監察」早前就各區區議員嘅橫額進行搜查行動，發現民主派區議員懸掛嘅橫額，有多達84條涉嫌「播毒」，當中涉及不實內容、散播仇恨、涉商業宣傳等「5宗罪」，該團體要求地政總署唔好再愛理不理，促請署方設立橫額內容送審機制，而各區民政事務處亦不應發還相關橫額嘅報銷金額，及從速派員拆除橫額。
團體促設送審機制
身兼議會監察成員嘅荃灣區議員葛兆源力數民主派議員所懸掛橫額嘅「5宗罪」，分別係不實宣傳或報道、散播仇恨、宣揚仇警情緒、牽涉商業宣傳或收費服務，同埋抹黑政府同中央政府。葛舉例指，有「播毒」橫額標明「港康碼不能防疫、出賣私隱」，又有橫額違規宣傳要收錢嘅流感疫苗注射活動，炮轟內容不盡不實，又冇正確使用橫額宣傳社區資訊。葛仲話，呢年嚟好多街坊都同佢反映，睇到呢類內容就覺得好厭惡。
議會監察召集人、深水埗區議員劉佩玉就促請政府要建立一套統一嘅橫額審批準則，地政總署亦要設立橫額內容送審機制，以避免出現抹黑、不實及散播仇恨等內容。另外，劉又要求民政事務處更新內部申請發還開支指引，拒批唔合規則嘅橫額費用，如有發現相關橫額亦應盡快拆除，同埋收取拆除費用及取消有關指定嘅懸掛位置。