政情：小黃鴨之父 大爆林健鋒讀書唔見人
著名工業家「小黃鴨之父」、立法會議員林健鋒（Jeffrey）嘅爸爸林亮，早前去到一間幼稚園送鴨仔，仲大爆Jeffrey細個試過成日唔見人，唔知去咗邊添！
林亮覺得男仔生得百厭先正常，而囝囝Jeffrey唔多唔少都有啲百厭，喺佢讀大學嗰陣，有次林亮由朝到晚不停打電話都搵唔到佢，Jeffrey之後話全日都留咗喺圖書館，林亮就話如果真係認真讀書當然係好事，但就無人知Jeffrey係講真定講假喇！佢話唔單止讀書，男仔當然要見吓世面，早喺Jeffrey兩、3歲嗰陣，已經帶佢去工廠見識，不過工廠咁多機器始終有一定危險，所以都會拖實Jeffrey，唔畀佢周圍走。
堅信教育可改變一生
其實佢嗰日去到凱莉山國際幼稚園參觀，仲分享咗對教育嘅理念。佢並無接受過幼稚園同大學教育，細個喺內地私塾讀咗3年，就因為戰爭而暫停，之後幾經辛苦入讀香港華仁書院，但又再次因戰爭而結束79日嘅中學生活，同時結束佢一生嘅求學生涯。但係佢一直相信教育可以改變人嘅一生，培養小朋友學識正直、勤奮等嘅良好價值觀。