政情：公民講場：私家診所嗌開倉 衞署懶理疫苗荒

近日市面嘅流感疫苗短缺，衞生署話會向參與疫苗資助計劃嘅醫生分階段提供10萬劑疫苗，但咪諗住可以紓緩短缺，事關首階段分配嘅係噴鼻式疫苗，但好多病人向私家診所預訂針劑疫苗，礙於手續繁複，部分診所冇領取額外疫苗，即係要用針劑又要再等。咁嘅情況唔知係咪錯配，但為咗救急，有醫生呼籲政府喺庫存中撥出更多疫苗畀私家診所，即係叫政府開倉呀，市民嘅健康最重要，署長陳漢儀咪扮聽唔到。