中環出更：禁電子煙草案「翻生」 黃定光當選主席 申報係煙民
本來已被視為「胎死腹中」嘅《2019年吸煙（公眾衞生）（修訂）條例草案》，因延任議會而「翻生」，草案委員會尋日召開會議選舉主席，進出口界議員黃定光（象哥）以20票擊敗獲10票嘅衞生服務界議員李國麟；航運交通界議員易志明再擊敗李國麟，成功擔任副主席。
喺會議上，議員郭家麒曾要求兩名候選人，即象哥同李國麟交代有冇吸煙，但主持會議嘅飲食界議員張宇人就認為條例草案並唔係禁煙議題，委員應衡量有冇利益衝突，再自行決定係咪申報。
需否從頭研究 意見不一
象哥當選主席後隨即回應郭家麒，自行申報有吸煙習慣，但澄清從未使用電子煙或加熱煙產品。佢喺會後直言，「其實唔需要申報，又唔係做煙草生意」，仲反問若有草案涉及酒精飲品，咁咪全部人都要申報？
會議上亦討論係咪重新開展委員會研究工作。批發及零售界議員邵家輝認為有新委員加入，需從頭開始研究；議員郭偉強同會計界議員梁繼昌就認為，可以跟上年度嘅工作進度繼續委員會嘅研究工作。
卓妮