中環出更：吊戲癮有咩計？ 高鼎國一家四口上網睇
早前因疫情影響，全港戲院曾兩度停業。因應近排疫情轉趨緩和，政府容許戲院可以有條件重開，上海總會（總會）早前就包場畀會員同啲親友睇戲，卓妮喺戲院門口見到總會青年委員會主任委員高鼎國同太太，當然捉住佢問吓疫下吊戲癮點算喇！
講起睇戲，高鼎國都話自己久唔久都會入戲院，隨着兩個囝囝開始大，睇乜嘢戲就由佢哋話事，疫情期間減少外出，只好喺屋企上網睇。喺屋企睇氣氛係咪差啲？但佢話喺屋企睇戲又有唔同嘅樂趣，事關喺屋企唔需要好似喺戲院咁坐定定喺度睇，自由度高啲，有時一家四口會坐喺張床度一齊睇戲，都係另一番樂趣。佢仲話開心見到娛樂場所逐步放寬，市民多個地方選擇，最重要係可以振興經濟幫吓啲商戶。
轉頭見到總會常務理事李惟宏帶埋91歲嫲嫲嚟睇戲，認真孝順。問佢前排冇得睇戲有冇吊癮？佢話唔多唔少都有啲，惟有喺屋企翻箱倒籠摷番啲舊戲出嚟睇，或者上網睇，佢仲話始終入場睇戲投入啲，自己就鍾意食住爆谷睇戲。佢話雖然疫情之下戲院內暫時唔可以食嘢，但都冇所謂，最緊要大家守規矩，咁都睇得安心啲。
方劉小梅彈琴消磨時間
香港中華基金會創會主席方劉小梅就孖住老公入場，方太話一向鍾意睇戲，早前邊度都冇得去，惟有喺屋企搵啲嘢做，幸好自己又鍾意彈鋼琴，所以呢段時間喺屋企練習吓，等疫情好轉就會同啲團體合作搞啲表演，依家戲院開番，大家都多一個好去處嘞！
卓妮