政情:葛珮帆葉劉抱恙 惹新冠疑雲

疫情未到盡頭,流感高峰期又將殺到。議員葛珮帆(EQ)就「打敗仗」喇,不但頭暈頭痛、仲要發燒添!而另一邊廂,議員葉劉淑儀(葉劉)亦告抱恙,話出現流鼻水、喉嚨痛等迹象,擔心自己成為無症狀嘅新冠肺炎潛在感染者喎。莫非將要爆發立法會群組?

EQ尋日喺社交平台發文,話自己前日開始鼻塞、頭痛,就連呼吸都覺得痛,夜晚仲要發燒添。雖然之後退咗燒,但就話周身痛,穩陣起見都係做咗病毒測試,並留喺屋企等結果。

而葉劉前日(4日)就缺席立法會大會,佢其後就交代話,自己一大清早起床感到身體不適,想到經常同陌生人接觸,當即心頭一悚,擔心感染新冠肺炎,為免傳染畀其他人,佢當日就冇返工,即刻做咗新冠肺炎病毒測試,好彩結果係陰性,不過就患上一般流感,惟有臥床養病,暫停工作一日。

網民憂議員互相傳染

有網民就留言話,依家有議員病咗,擔心立法會開會導致議員互相傳染,提醒議員要帶番好口罩。其實有議員喺開會嘅時候偶爾都會除低口罩講嘢,加上立法會會議廳嘅座位雖然隔得好開,但始終係多人聚集,議員都要注意吓喇!

第一手消息請下載on.cc東網iPhone/iPad/Android/Windows Phone Apps