中環出更：屢揚威國際 吳克儉：港人藝術潛能咪睇小
香港社會向來予人嘅印象，係精於商業經營，但藝術素養方面則嫌不足。不過教育局前局長吳克儉就留意到一個現象，就係近年有唔少同藝術創作有關嘅國際賽事，港人往往都見諸於得獎名單，其中學童嘅成績尤其驕人，所以佢覺得港人嘅藝術潛能，不容小覷咁話。
吳克儉認為藝術係人類日常生活當中，能產生感覺同意義、以及惹來共鳴嘅事物。其實大家嘅尋常日用都充斥着有待發掘嘅創作元素，譬如鰂魚涌有幾幢相連嘅住宅樓房看似普通不過，但只要調整一下視角，就拍攝得出遠近知名嘅「怪獸大廈」。除咗攝影同繪畫，吳亦好欣賞陶瓷藝術，佢話曾經到訪佛山禪城，留意到當地好注重同陶瓷相關嘅教育，以致小朋友嘅陶瓷作品往往極具創意，令人擊節讚賞，實在值得香港借鏡。雖然藝術教育宜從小就開始，但藝術創作就唔應該有年齡限制，吳早前同朋友創辦「香港中西藝術文化交流協會」，又同另一機構協辦名為「藝力創未來」嘅藝術作品徵集活動，下個月開始收集不限類型嘅藝術創作，只要年屆6歲以上嘅巿民都可以參與。
由黃經國擔任主席嘅藝術管理及推廣平台「經藝聯」，就係今次藝術品徵集活動嘅主辦機構。黃經國指東、西方嘅藝術發展儘管都經歷千年歲月，然而華人社會長久以來都未能發展出類似西方人近300年來所建立嘅一套管理藝術方法。所以佢近年喺香港推行藝術管家培訓計劃，並就此提供免費課程、考核以及藝術品認證制度，藉此推廣華人藝術創作，同時提升大眾嘅藝術素養。
楊家慧：每人對創作有不同評價
中華菁英扶輪社創社社長楊家慧就指，藝術包含形式、顏色、主題同抽象等元素，由於每個人嘅理解同感受都唔同，欣賞同一件藝術創作，評價都未必一樣。而佢自己作為藝術企業家，會同朋友介紹不同藝術作品入面嘅故事同理念，拓闊大家嘅鑑賞能力。
卓妮