政情：區議會頻宣揚港獨 議員促政府睇實
今屆區議會由泛民主派主導，唔少區議會拒絕籌辦或撥款資助本年嘅七一及十一活動，但政府就一直「懶理」。議員何君堯尋日喺立法會大會提出相關嘅口頭質詢，當局承認過去一年區議會分別否決近六成、四成嘅相關活動申請。有議員認為現時區議會宣揚港獨問題嚴重，要求局方正視，杜絕區議會繼續煽動仇恨。
民政事務局局長徐英偉話，由於疫情關係，大部分活動要取消或延期，但18區民政事務處仍成功舉辦22個七一活動同35個十一活動，佢又話現時政府部門同公營機構喺超過350多個地點展示五星旗同區旗。
增國民意識做法古舊
議員梁美芬直斥局方增加國民意識嘅做法古舊，又強調部分區議會宣揚港獨問題嚴重，佢認為區議員政見可以唔同，但必須擁護《基本法》同效忠特區，促請當局正視問題，杜絕區議會繼續煽動仇恨。徐回應話未來會加強與區議會諮詢架構合作交流，進一步解釋《憲法》同《港區國安法》等。何君堯則認為喺300多個地方懸掛五星旗同區旗，數目過少，詢問政府增加掛旗地點嘅可行性。
