政情：廠商會換屆 史立德料接任會長
香港中華廠商聯合會（廠商會）會董會3年任期即將屆滿，換屆選舉正如火如荼進行，預計下星期先舉行會董選舉，月尾選會長，至12月初選出常務副會長同副會長。過去會長之爭係重頭戲，但今年就好和諧，應由第一副會長史立德接棒，但常務副會長競爭激烈，預料有8至10人競逐，其中現任副會長盧金榮呼聲最高，但佢就無正面回應係咪參加競逐。
常務副會長競爭激烈
據了解，現時有110位會董，當中三分二不變，另外三分一、即37位需要輪替，而暫時參加競選有45人，而呢30幾人係由抽籤決定嘅。
會長吳宏斌話，之前修改會章，就係為咗避免再次出現爭崩頭局面，依家無第一副會長，換咗常務副會長，需要會董投票選出，合資格都可參加競選，各自有工作，唔會話偏幫一邊。
盧金榮同樣覺得今屆選舉好和平，被問及做常務副會長嘅呼聲最高，佢就無正面回應，笑言都係等待會董同會長選舉結束後再諗。