政情：有相為證：做完手術 易志明淚灑立會
泛民主派繼續喺立法會大會以點算法定人數方式拉布，喺響緊鐘、Call議員返會議廳開會嗰陣，航運交通界議員易志明（Frankie）「落淚」喎。唔通係畀一班泛民激到喊？
話說當時Frankie喺位度攞紙巾抹眼淚，其實佢係滴緊眼藥水，手上攞住唔止一支眼藥水，仲要滴咗幾下添！
原來Frankie早前做完白內障手術，醫生用心良苦咁勸喻佢要多加休息，但Frankie話邊有得休息吖，仲指住手上裝滿文件嘅環保袋，話啲文件最麻煩，有排睇。做完白內障手術會畏光，但無可避免要喺夠光嘅環境下睇文件，所以要不停滴眼藥水，但見到佢對眼都係紅晒，淚水汪汪咁。
日前先講完議員黃定光（象哥）前排都做完白內障手術，覆診嗰陣要滴藥水放大瞳孔做檢查，但同時會令雙眼畏光，所以開會嗰陣要戴「黑超」。Frankie都話做完手術，其實係要戴副黑超比較好，睇嚟佢都要準備吓先得喇！