政情：再度流會 又要拉布 又玩失蹤 泛民遭突襲攞嚟衰

建制撤發言 結束草案二讀辯論

話說尋日開會審議《2019年漁業保護（修訂）條例草案》，民主黨涂謹申隨即要求點人數，最終喺15分鐘後，因冇足夠法定人數而流會，當時會議廳內只有34名議員在席，其中泛民只有一人出席。

喺半個鐘多少少就復會後，民主派議員繼續多次發言，仲嘗試以性別問題、漁業式微等方式去切入討論，但就畀立法會主席梁君彥同代主席李慧琼批評離題，最終草案獲三讀通過。面對又點人數又流會，漁農界議員何俊賢鬧爆民主派拉布冇意義，只係想顯示佢哋留任嘅剩餘價值，但咁做係嚴重破壞社會，對搞拉布同埋流會嘅議員予以嚴厲譴責。

之後審議廣播條例時，唔少議員批評政府成20年都未有及時拆牆鬆綁，其中資訊科技界莫乃光仲鬧爆政府辦事效率差，話最新嘅iPhone 12都推出市面，政府依家先畀市民一部絕版嘅Nokia手機。

就喺謝偉銓發言前又有議員點人數，喺復會之際大部分泛民不在席，包括民主黨尹兆堅同埋之後幾位發言嘅民主派都唔在席，謝偉銓就要求撤回發言，梁君彥隨即都結束二讀辯論環節同埋邀請官員發言，最後草案亦獲得三讀通過。

尹兆堅認疏忽 泛民編更表補鑊

畀建制派突襲成功，尹兆堅承認自己疏忽，被建制派陰到深感抱歉。佢仲話近年未見有建制派透過撤回發言加快審議進度，所以事前難以預計有咁嘅情況，未有即時作出反應。據悉，泛民會編排更表補鑊，但詳情就仲傾緊。

喺新一年度立法會開波以嚟，民主派喺3次大會都不停點人數。尋日會議就點咗11次人數，花咗2小時8分鐘；前日就點咗13次人數，用咗2小時43分鐘，而喺上周三及四嘅大會，總共點咗25次人數，用咗3小時46分鐘，真係嘥時間又嘥公帑。