中環出更：斥拖延選IT委員會主席 何君堯設死線促DQ莫乃光
喺議員莫乃光主持下，立法會資訊科技及廣播事務委員會經過兩次會議仍未選出正副主席。有意競逐委員會主席嘅何君堯質疑莫阻礙議會進度，尋日去信立法會主席梁君彥，話如果今日會議仍未選到就要革除（DQ）莫主持資格。
莫喺之前嘅會議容許泛民不斷提名唔同嘅議員參選，仲話搞選舉論壇同可向候選人提問。何話咁搞法3個鐘都完唔到，今日嘅會議亦一定唔夠時間，拖得實在太耐，所以尋日去信主席，要求今日會議完唔到選主席部分就要更換主持。
提議搵陳健波做主持
何話處理一個簡單選舉必須要有秩序有效率，唔好畀人感覺同流合污、為虎作倀，如果再咁落去有理由相信莫行為不檢，直指有基本操守嘅人、有適當處事能力嘅主持，係唔需要兩個鐘，甚至3個會議去選主席，如果仲冥頑不靈，不但係行為不檢，更加可以根據《議事規則》第49B（1A）條例嚟動議譴責佢。
DQ咗莫，邊個做主持？何笑言可以搵財務委員會主席陳健波（波哥），話波哥喺上會期主持內務委員會主席選舉時非常成功，一定駕輕就熟，10幾分鐘搞掂。波哥就話何真係抬舉佢，但其實仲有好多其他人選嘅，但因波哥有意競逐委員會副主席，到時選完要即刻落嚟，真係好忙碌。
另外，何被母校皇仁書院舊生會暫停會籍至2022年，佢回應話有關會籍對佢而言，係一粒塵都不如，對佢毫無影響，唔會跟進有關事件。
卓妮