中環出更：隔離14日好食好住 何建宗被笑快變肥仔
疫情仍未受控，依家港人到內地必須隔離14日。香港嘅紅潮專家、香港極地研究中心創會主席何建宗教授早前都到咗上海，當然都要隔離14日先啦，佢話最緊要係制訂好時間表、勤收拾打掃同注意自律。
何建宗日前去到上海開始隔離，佢喺社交平台講笑話呢14日嘅生涯規劃由一個杯麵開始，聽落好似有啲頹喎！不過，佢之後就上載咗上海「隔離營」嘅飯餐畀大家睇，有菜有肉，仲大讚食物有一定嘅水平，要畀個「Like」，有網友仲笑佢好快就變肥仔添！
去上海做乜？事關佢係上海海洋大學嘅特聘教授，每年呢個時間都要返去教書。佢話今年特別啲，由於隔離檢疫往返各14日，航班交通不便，所以要「一去不返」，估計過咗新年、近農曆年先返港嘞！
高松傑呻酒店唔畀叫外賣
話說香港菁英會副秘書長高松傑（高Sir）近排都返咗內地，仲拍片分享喺深圳嘅隔離「攻略」，叫大家選擇指定嘅隔離酒店時，千祈唔好揀龍華區，仲大呻「真係搞唔掂」。原來呢區嘅隔離酒店唔畀人叫外賣，只可以食酒店提供嘅餐盒，加上又唔畀帶鬚刨、火機同樽裝水上樓，只可以自己煲水飲，但好彩最後都畀佢乞求到支水返嚟，不過都認真唔方便啦！
聽高Sir講，如果喺深圳隔離，最好係揀南山區或者羅湖區嘅指定酒店，因為至少可以叫外賣喎。另外，亦有喺珠海做緊檢疫隔離嘅導演朋友同佢講，珠海嗰邊嘅指定酒店都可以叫外賣o架！
香港中華出入口商會副會長許華傑（Michael）上個月中都返咗內地兼且隔離完，已留喺武漢一段時間。繼早前送別港府駐武漢經濟貿易辦事處主任馮浩賢之後，Michael早前再同剛到履職嘅新主任郭偉勳食飯，歡迎佢到埗。唔知Michael會唔會等港府話唔使隔離14日先返港呢？
卓妮