政情：惠民措施反口覆舌 議員轟政府不知所謂
政府早前宣布，計劃將長者及合資格殘疾人士公共交通票價兩蚊優惠嘅合資格年齡門檻，由六十五歲下調至六十歲，但最近有傳政府將延期或擱置該措施。議員田北辰（田二少）尋日就拍片話，政府畀市民嘅感覺係反口覆舌、批評政府愈嚟愈不知所謂。佢又話政府就連民生議題都搞到變成政治議題，甚至影響管治威信，都唔知政府發生緊乜嘢事囉！
顧問報告都有 「唔知等咩」
田二少喺社交平台上載咗條短片，話政府早喺本年初就話要推出呢項優惠措施，而勞工及福利局局長羅致光喺七月份嘅時候話已經完成諮詢，並會分析顧問報告。之不過依家已經十月，局方仲未有確實時間表。田二少話八達通閘機需四個月嘅時間就搞掂，倘若政府依家落實優惠，出年二月就可以實行，加上顧問報告都已經搞掂，唔明白政府仲等緊乜。佢話咁好嘅施政項目，搞到市民質疑背後發生乜嘢事，真係唔知政府點解可以搞成咁。
至於早前有行政會議成員話優惠唔符合經濟效益，質疑優惠措施會益咗交通運輸公司。田二少就話多咗人搭巴士會令巴士公司有利潤保障，到時巴士就唔需要加價，相信六十歲以下嘅市民都會歡迎呢項措施咁話喎。