民主派人士喺反修例風波期間成立「六一二人道支援基金」（基金）支援示威者，但過往曾被質疑涉嫌逃稅。負責基金嘅民主派人士近日就講起基金存款情況，只餘三千六百萬元，由於法律開支上升，呼籲市民再捐錢應付未來十八個月嘅支出同埋維持財政穩健。
截至今年八月三十一日，基金總捐款額達一億六千萬港元，現時存款只餘三千六百萬元。負責基金嘅民主派人士近日指基金升幅最大係法律費用資助、法援分擔費資助同還押在囚物資嘅補貼，而喺還押被囚人數增加同相關物資需求都會持續上升，所以呼籲捐款。佢仲話依家有逾二千宗涉及反修例運動案件，約六百八十宗涉及暴動罪，陸續喺區域法院展開審訊，其餘約一千四百宗涉及唔同罪名嘅案件就喺各裁判法庭審理。
喺「撲水」之餘，該名民主派人士話嚟緊會推出兩個新資助計劃，包括「第二位大律師」資助計劃，同埋預付部分已排期正審案件嘅法律費用，如以十八個月計算就要二千二百萬元。
話時話，早前有市民到灣仔稅務大樓請願，舉報該基金涉嫌逃稅，未有繳交相應利得稅，促請稅務局盡快徹查基金操縱人有冇蓄意逃稅同埋係咪違反稅務條例。