中環出更：劏房租管研究慢 梁永祥話值得嘥時間

疫下易食閉門羹

梁永祥接受電台訪問時話，小組已委託咗調查機構探訪劏房戶，目標係要到訪二千座大廈、共五千戶劏房戶，但受到疫情影響，調查食「閉門羹」嘅機會增加，依家淨係去咗二百座大廈，收集大約三百份問卷，形容係小組運作半年以嚟遇到最大嘅問題。

佢又話按原定計劃，調查機構需要喺明年首季提交報告畀佢哋，而小組亦要喺明年上半年對租務管制建議提交整體報告，仲話唔希望推遲。佢又透露，小組成員早前探訪過幾十戶劏房戶，又同關注團體交流，歸納出嚟嘅問題都係一致，包含劏房戶冇簽租約、水電費收費準則由業主訂立及居住環境惡劣等。

之不過，小組用咗咁多時間去了解呢個為人所共知嘅問題，就惹來外界批評佢哋工作過慢。梁永祥強調「唔係聽日交咗份報告就行咗去」，認為有需要用多啲時間去研究今次搜集到嘅資料，搵出解決方法，仲話如果可以提高報告嘅認受性的話，覺得今日嘥多少少時間都係應該喎。

但喺疫情受阻下，係咪能夠如期提交到報告？大家要拭目以待嘞！

卓妮