中環出更：林超英：綠色氫氣發電 可達零碳排放
為緩解全球暖化，唔單止要減少使用石化燃料，仲要大力發展可再生能源，然而後者成本高但效益低，要達致零碳排放，莫非一味靠慳？天文台前台長林超英話其實仲有一種方法，大家既可以「燈照開、飯照煮」，又冇溫室氣體排放之慮，仲可能令人類擺脫長期以來對石化燃料嘅依賴。到底係乜嘢招數咁神奇呢？
林超英話現代文明離不開能源，若果將太陽能或風力等可再生能源所發出嘅電力，將水電解為氫氣並以此作為燃料。因過程中嘅碳排放係零，所以就叫做綠色氫氣。佢話發電係香港碳排放嘅主要來源，其次就係路面行駛嘅車輛，若果發電廠改用氫氣，車輛以電力或者氫燃料驅動嘅話，香港嘅碳排放就可以大幅降低。不過，佢又話就算綠色氫氣得以普及，都唔代表溫室氣體就此絕迹，因為埋喺堆填區裏面嘅廚餘同其他有機物質，分解過程中會產生沼氣，其溫室效應較二氧化碳更要強三十倍，所以就算有潔淨能源，大家亦千祈唔好浪費食物呀！
沈祖堯：人類地球共存共榮
其實林超英係應社企Encompass HK嘅邀請，為日前嘅環保論壇「Countdown，Go Far」擔任演講嘉賓。該社企嘅創辦人戚本乙（Benita）係業餘潛水教練，佢話溫室效應不但令到珊瑚大量死亡，其中微塑膠更污染海洋，當大家品嘗生蠔鮮魚等海產，隨時有可能將微塑膠亦一併食埋落肚。Benita認為環境污染已危及人類嘅食物鏈，再唔阻止生態破壞的話，恐怕日後悔之已晚。至於實踐綠色生活，佢話唔單止要盡量「走塑」，最好做到物盡其用，而佢身上嘅衣着同隨身嘅手提袋，主要由二手店購得。
身兼環境運動委員會主席嘅沈祖堯醫生早前出席一個節目開幕禮，佢話環保嘅目的就係令世界乾淨啲，而地球生病都會令人類隨之生病，兩者可謂共存共榮，當中有三成嘅人類疾病更加同環境有關，例如空氣污染會引致呼吸道疾病，仲有癌症同心肺功能有關疾病同樣與環境有關，呼籲大家要出分力保護地球嘅健康喇！
卓妮