政情：遭追8.4萬訟費 黃之鋒扮窮嗌籌錢
二○一四年違法佔領行動（佔中案）中，時任學民思潮召集人黃之鋒因非法集結及違反法庭禁制令，分別被判監兩個月及六個月。佢尋晚喺Facebook透露，收到律政司來信指法援未能支付其所有聆訊的法律費用，所以向佢追討八萬四千元。
香港眾志解散 戶口餘款蹤杳
黃之鋒形容自己係冇組織聯繫嘅政治人物，要籌集八萬多元並唔係容易嘅事喎，莫非佢想扮窮？不過，佢之前擔任秘書長嘅香港眾志解散時，外界都質疑眾志戶口餘下資金去咗邊，亦似乎冇人詳細交代過盤數，黃之鋒只向網媒表示餘下款項會用得其所，點解依家又唔用嚟還訟費呢？
二○一四年十一月廿六日，黃之鋒早上聯同時任學聯副秘書長岑敖暉抵達旺角佔領區，兩人同被警方以違反禁制令拘捕，其後被控刑事藐視法庭。黃事後承認控罪，前年一月被判即時入獄三個月，其後黃提出上訴，到去年獲減刑至兩個月監禁。