政情：林健鋒牛一 開香檳要提防被罰
立法會議員林健鋒（Jeffrey）尋日同一眾黨友慶祝佢嘅六十九歲生日，得到黨友張華峰（肥老闆）所送嘅生日蛋糕，加上議辦職員準備嘅另外兩個蛋糕，認真係三喜臨門！肥老闆仲特地帶咗支香檳嚟賀一賀，不過在旁嘅主席梁君彥就提醒Jeffrey開嘅時候要小心啲：「整落地氈要罰你十一萬（口架）！」
開完香檳後，Jeffrey就同大家分享佢今年嘅生日願望，話作為工商界嘅代表，當然希望香港可以盡快同其他地方恢復通關，個個有工做、有飯食。佢又話，囝囝唔單止晏晝同佢一齊食飯，晚上亦都為佢安排好節目。被問到想唔想囝囝快啲結婚？Jeffrey就話，呢個係每個父母嘅希望喎。
一啖「食咗個疫境」
講番議辦職員準備嘅兩個生日蛋糕，今年嘅祝福語句繼續由肥老闆題字，其中一個就一如往年咁大玩食字，祝願「乘鋒破浪」！另一塊就因應時事，祝福牌寫上「衝出疫境」，Jeffrey之後仲拎起佢咬咗一角，形容自己「食咗個疫境」添！