中環出更：泛民又拉布 兩委員會選唔到主席
繼上周立法會資訊科技及廣播事務委員會，及福利事務委員會未能選出正副主席，兩個委員會尋日朝早繼續討論主席選舉事宜，惟泛民皆於兩個會議上以容許候選人陳述政綱及設提問環節嘅方式拉布拖延，令到兩個委員會未能選出正副主席，有作為候選人嘅建制派議員相當不忿，揚言要革除莫乃光主持會議嘅資格。
喺資訊科技及廣播事務委員會嘅會議上，建制派議員何君堯以及多名民主派議員獲提名，惟主持選舉嘅資訊科技界議員莫乃光容許候選人陳述政綱及設提問環節，遭多名建制派批評同表達不滿。
建制議員揚言要DQ莫乃光
候選人之一嘅何君堯表示，提名程序浪費時間，假如下次會議仍然未能選出主席，將促請立法會主席梁君彥革除莫主持會議嘅資格。議員謝偉俊表示，莫嘅決定並非絕大部分委員會嘅做法，認為應徵詢全體委員意見。
議員陳恒鑌則希望唔好浪費議會時間，認為安排唔合適，同樣覺得應該先去詢問委員是否同意。
至於福利事務委員會方面，多位民主派議員同樣獲提名競逐主席，而建制派方面則只有議員蔣麗芸獲提名，主持會議嘅民主派議員鄺俊宇亦重複上述拉布伎倆，令委員會無法選出主席。
卓妮