中環出更：年初防疫物資短缺 陳振彬：永世難忘口罩荒
突如其來嘅疫情打亂成個世界，今年年初嘅防疫物資都變得奇貨可居，撲口罩撲到冇覺好瞓者，大有人在。雖然供不應求嘅現象不再，但對於當時一罩難求嘅情況，觀塘區議會前主席陳振彬（Bunny）都話百年一遇、永世難忘！
Bunny日前就出席咗一個捐贈防疫物資嘅活動，佢話舊年年尾因舉辦「齊清潔愛香港 」活動，因此訂咗過萬口罩並存喺貨倉，所以疫情初期都仲有得派畀有需要嘅人，然而存貨畢竟有限好快就派晒。儘管當時嘅口罩價格飆升兼貨源不足，亦無可避免咁加入戰團四出搶購，佢話試過同生產商訂購一千萬個口罩，但最後交貨只係畀得二百萬個，Bunny苦笑話算好彩o架喇，佢聽聞有人試過訂一百萬個，結果係一個都冇添。
Bunny又話疫情一直反覆，市民對防疫物資嘅需求從未停過，幸好社會上都有唔少熱心人慷慨捐贈物資，等佢哋可以派畀有需要嘅人，後來本地出現多間口罩生產商，市民依家都叫做鬆一口氣。
董吳玲玲為撲口罩冇覺好瞓
同場嘅嘉賓，善德基金會主席董吳玲玲，就試過為咗撲口罩而冇覺好瞓。佢話屋企雖然係有小量存貨，但知道好多市民同醫護都唔夠口罩，就即刻同一班朋友全球搜羅，由於時差關係，為咗第一時間同歐洲廠商聯絡，試過凌晨兩三點先瞓，跟住就清早起床搵專業人士鑑別廠商提供嘅口罩規格證明，合規格就速速訂貨。雖然瞓少咗，不過董太話幫到人就精神晒。
同場仲有新界社團聯會嘅理事長陳勇同副理士長李世榮。陳勇話從未諗過口罩會咁搶手，誇張到好似戰略物資咁有錢都未必買到，疫情初期自己好慳住用，一個口罩最少用一日，話望住屋企得番半盒口罩就發愁，因為唔知下一盒幾時先到手。
李世榮就話當時自己儼如「藥房友」，全港大小藥房周圍搵，但限購措施下只可買兩盒，惟有即刻通知親朋戚友邊度有得賣囉。李世榮話依家唔同晒啦，口罩變成衣飾嘅一部分，而且花款眾多，佢細女都會揀印有心儀卡通人物款式嘅口罩襯衫喎。
卓妮