政情：假會計師充斥 業界轟梁繼昌幫兇
香港會計師公會（公會）早前向會員發出「建議修改道德守則徵求意見稿」，但遭到多個會計界團體批評新修訂唔單止打壓受監管會計師嘅生計，亦冇處理到打擊假會計師嘅問題。所謂一石激起千重浪，多名會計界團體嘅代表尋日前往公會請願，要求撤回修訂，又翻舊帳鬧爆會計界議員梁繼昌，喺立法會表決有關堵塞假會計師漏洞嘅《二○一八年專業會計師（修訂）條例草案》時缺席，直斥「難辭其咎」。
不滿缺席立會投票
會計界愛心同盟執行主席林智遠批評，假會計師係困擾業內多年嘅問題，但梁竟然喺投票條例草案嗰時走咗去，任由佢其他泛民盟友否決條例，狠斥梁冇正視同幫助業界需要。林又指，有九成五受訪者都對修訂感不滿，促請公會唔好通過修訂。
對於公會今次嘅新修訂，中小微企生存關注組召集人吳錦華批，公會打算無上限咁提高監管要求，只進一步增加全港九成以上，由一至兩名合夥人組成嘅小微會計師事務所嘅經營成本，同阻礙年輕會計師嘅創業機會。