勞工顧問委員會（勞顧會）僱員代表選舉將於十一月廿一日舉行，喺選舉提名期最後一日，民主派派出五人報名參選，佢哋批評選舉由建制工會控制，淪為被政府壓制勞工權益嘅工具，佢哋就話無評估勝算，只係希望參選可以凸顯選舉不公咁話。
五名跨工會代表包括社會及政治組織從業員工會李志宏、雷謙凱、香港金融業職工總會主席郭嘉榮、香港酒店工會主席徐考澧同教協文浩然。
佢哋話過往勞顧會僱員代表多由建制派出任，「全票制」同「一會一票」嘅制度被建制工會所把持，屬於小圈子選舉，之但係佢哋既然覺得呢個選舉咁不公，都仍然選擇參與喎，咁係咪變相承認選舉呢？
身兼沙田區議員嘅李志宏話，政府一直以勞顧會未達成共識為由，無限期拖延勞工階層嘅訴求，包括訂立標準工時、集體談判權等。五名代表同時希望爭取罷工保障、抗衡職場政治打壓等。
現屆勞顧會委員任期將於今年屆滿，換屆選舉將於十一月廿一日舉行，選出五名僱員代表出任下屆委員，任期為兩年，至二○二二年十二月三十一日。