政情：放寬兩元乘車優惠擬煞停 梁美芬向羅致光追債

其實呢項政策爭取多年，才得到政府宣布落實，但由宣布至今近一年，遲遲未有具體時間表，早前勞工及福利局局長羅致光指，正要求顧問公司提出切實可行方案，待顧問公司年中提交檢討報告後就可能去落實。但點知，嚟到年尾呈交最新財政評估後，就突然轉向，話有行會成員認為喺經濟不景氣情況下，政府唔應該就福利項目增添長期負擔，意味之前嘅承諾恐成泡影啦。

梁美芬對消息感到震驚，認為呢種講法係傷盡港人心。梁話行政法有「合理期望」概念，如果主事官員包括特首公開承諾一項政策，市民自然會有期望。梁又提到，政府官員曾經具體同清楚地交代推出時間，若突然認為財政未能負擔而推倒計劃，真係講唔過去。梁希望以經濟效益為由反對計劃嘅行會成員改變立場，因為政策係回饋長者過去對社會貢獻。

無心推展 賴濫用長者八達通嚴重

另外有消息指，由於市面上流通嘅長者八達通卡超過四百萬張，較合資格老年人口一百三十二萬多出逾兩倍，政府覺得長者八達通個個都買得，話要先推展附有姓名、相及身份證號碼嘅個人八達通，杜絕濫用情況先可以放寬年齡門檻。至於政府仲有無意推行？有行會成員就透露，話羅致光已經開始同八達通公司傾緊詳情，但製作個人八達通需時，因此未知具體時間表。

身兼行會成員嘅議員黃國健就承認，社會上係有唔同睇法，若果政府數據係啱，加上濫用嚴重嘅話，每年耗費可能過百億。但黃覺得政府之前應承咗，相信唔會走數，自己未來亦會要求政府找數。佢又坦言，香港退休保障制度好唔完善，其實個個都想交通費平啲，加上有好多六十至六十五歲長者都仲返緊工，如果有兩蚊乘車優惠，的確可以幫輕唔少。

行會成員：每年百億開支回報微

而行會內亦確實有反對聲音，有身兼行會非官守成員嘅資深大律師就話，當時嘅專家研究報告喺疫情爆發前撰寫，但現時形勢大變，再參考當時報告已不合時宜，有關支出屬經常性開支、金額大，當時計數仲要未計及通脹，如果未來車資加價，政府補貼金額亦水漲船高，到政策推行第五年時，可能每年涉一百億港元開支。

佢又引述政府過去提供嘅數據話，呢項政策只能帶嚟極輕微嘅經濟效益回報，依家政府為咗應付疫情都已經使咗一大筆錢，難保未來一年仍要推出紓困措施；加上政府預期未來一年都難有經濟增長時，佢唔敢拍心口話依家適合推行有關政策，強調必須審慎考慮。

事實上，羅致光過去對放寬兩元乘車優惠計劃拖得就拖，一再回應話要研究再研究，但誰知就研究到「唔符合經濟效益」呢個結果，又賴長者八達通有濫用情況，覺得唔適宜做，雖然社會上的確係有人濫用，但咁只屬於監管出咗問題，而唔係政府拖延放寬兩元乘車優惠嘅藉口囉！