中環出更：單車徑未妥就開 黃偉綸依家先諗補救
政府早前計劃連接新界嘅單車線，並於今年九月正式開放，單車徑連接新界東同新界西，全長六十幾公里。不過單車徑開放咗一個月左右，就有唔少市民反映問題多多，包括交通燈多、人車易撞、指示唔清晰等等，路牌甚至只係一張過咗膠嘅A4紙，未準備好就開放，叫市民點踩啊？
議員容海恩日前就同發展局局長黃偉綸，以及土木工程拓展署署長劉俊傑一齊踩新單車徑，向佢哋講番市民對單車徑嘅不滿啊！不過就算無聽到市民嘅聲音，其實黃偉綸自己踩一次都會發現好多問題。容海恩表示當日佢哋經過一個大十字路口，過路燈等候時間長，等待嘅單車都好多，如果有人唔遵守交通規則嘅話，無論單車、行人定車輛都會好危險。
路牌用A4紙頂檔
容又指，單車徑路牌欠奉，只用最原始嘅方法，一張過膠嘅A4紙就當係路牌，搞到車友好容易迷失方向。黃偉綸解釋製作路牌需時，惟有用A4紙頂住先，亦表示局方已經開緊會，討論緊開設單車地圖同應用程式方便車友。不過黃偉綸自今年7月起已經發網誌宣傳單車徑，無理由諗唔到單車徑可能面對嘅問題，仲要未預備好就開放，認真甩皮甩骨啊！
卓妮