中環出更：工作日程密密麻麻 萬能媽媽分身有術
現代婦女個個都周身刀，並且張張利。佢哋唔止可以兼顧家庭同事業，仲連自己嘅情緒都會管理得好好添。好似卓妮日前去咗個香港島婦女聯會新一屆執委會嘅上任儀式，同班新時代萬能媽媽傾開，先發現佢哋個個都已經將一心幾用嘅技能練到爐火純青嘅地步，又可以將廿四小時當三十六個鐘咁用，認真厲害啊，究竟佢哋係點做到呢？
本身有兩個小朋友嘅新任香港島婦女聯會主席、有「金錘」拍賣官之稱嘅金鈴就話，最緊要係時間管理做得好，好似平時佢做緊其他公職嘅同時，小朋友嘅行程亦已安排好晒，咁咪畀人覺得好似可以分身咁囉。另外更重要嘅係，金鈴本身都好鍾意將自己嘅行程排到密麻麻，所以一啲都唔覺得有壓力，仲話咁先至開心有滿足感啊。不過都可能因為佢淚點低，平時睇書睇戲都好易喊，算係不經不覺間釋放咗壓力啦。
至於名媛楊張新悅亦係新一屆港島婦聯副主席之一，生咗四個女嘅佢就話，自己一直覺得現代女性唔可以同社會脫節，雖然係全職媽媽，但佢都會做番啲慈善、社團嘅工作以回饋社會，畀個模範啲小朋友，所以即使平時要兼顧好各方面，有幾攰幾大壓力都好，佢覺得只要返到屋企，同小朋友玩吓、傾吓偈就咩煩惱都消失晒啦。
朱穎詩樂觀角度諗事情
同場嘅另一名新任港島婦聯副主席、兒童故事書《南山七小福》作者朱穎詩（Vincci）都係咁講，覺得每個人同家庭都有唔同壓力，最緊要唔好用負面嘅角度諗事情，認為辦法總比困難多。好似佢大女有發展遲緩，而特殊學校喺疫情期間都冇開學，佢都只好盡量諗辦法幫阿女做好啲物理治療，唔好畀佢因為咁而造成肌肉退化啊。
原來Vincci平時除咗會同小朋友傾偈減壓之外，佢仲會聯同前任港島婦聯會長鄺晶晶，趁依家小朋友恢復上課，偷閒同班姊妹淘組咗個「媽媽早餐會」，一齊食個早餐，傾偈呻吓咁話啊。
卓妮