政情：公民講場：天價帳單 嚇煞用戶 中電解畫 莫再含糊

疫情有所緩和，曾一度停止嘅水電煤抄錶工作恢復之餘，有關帳單嘅爭議亦浮上枱面。近日陸續有市民收到電費單，有人本來交開千幾蚊電費，一下子跳升至五千幾蚊；亦有用戶要交萬三蚊，較上一期電費驟增一萬蚊！中電方面就解釋話，市民多咗居家工作同煮食，加上天氣炎熱開多咗冷氣以致用電量大增。但有網民指電費係採「累進式收費」，如果中電將上期未有計算嘅用電量計入今期帳單，會一下子加大今期帳單嘅用電度數，變相交貴電費。到底真相係點呢？中電企業發展總裁莊偉茵要交代清楚呀，只係強調中電唔會多收電費，用戶係唔會輕易接受o架。