政情：曾睇染疫樂師演出 馬逢國終做檢測
香港管弦樂團（港樂）一名樂師感染新冠肺炎，佢日前喺傳染期曾參與兩場表演，合計有超過一千四百名觀眾曾觀看演出，當中包括民政事務局局長徐英偉，仲有體育、演藝、文化及出版界議員馬逢國。日前話唔打算接受病毒檢測嘅馬逢國就透露，尋日下晝出席立法會委員會會議前去咗做檢測，仲話自己一直冇拒絕過做檢測喎。
馬逢國話，自己觀看演出時有佩戴口罩，而且座位同舞台相隔一段距離，所以早前評估認為唔屬於高風險群組，冇打算接受檢測，但就重申自己係持開放態度，若果政府或衞生防護中心認為有需要，佢都會去做。佢又話，當局前日呼籲觀眾都應該做檢測，所以佢之後都有去做。
到過後台探班 徐英偉證冇中招
至於曾經到過後台探班嘅徐英偉，佢早前就進行咗病毒檢測，當時話喺未有檢測結果前，會取消所有公眾活動。徐尋日就喺社交網站發文，話收到短訊通知檢測結果係陰性，仲喺張截圖上加入表情符號慶祝自己可以出關添！