政情：四草案乘勢「翻叮」垃圾徵費 禁電子煙 料再爆拉鋸戰
上年度立法會會期於七月結束，垃圾徵費、禁止電子煙等四條草案的法案委員會隨即中止審議工作。但隨着立法會延任不少於一年，立法會秘書處尋日建議有關交付內務委員會（內會）處理嘅條例草案，可在今年度會期繼續獲得處理，意味住將於新一個立法年度重啟審議，而內會今日亦將自行決定，是否繼續處理四條草案。但其實過去禁電子煙及垃圾徵費草案等都備受爭議，喺建制派議員意見分歧下一直無法完成審議，今次若最終得以「翻叮」，又能否喺未來一年之內完成審議，還是最終都係「難產」，勞師動眾但又徒勞無功？
環境局被轟不按實際情況強推
四個法案委員會包括垃圾徵費嘅《2018年廢物處置（都市固體廢物收費）（修訂）條例草案》；禁止電子煙嘅《2019年吸煙（公眾衞生）（修訂）條例草案》；《專營的士服務條例草案》及《2019年差餉（修訂）條例草案》。但事實上，垃圾徵費及禁電子煙嘅草案過去均備受爭議，兩者經歷多次會議後，於今年六月因立法會會期完結而被迫中止審議。
以醞釀逾十五年嘅垃圾徵費為例，拖延審議至今仍未完成，環境局過去被轟不按實際情況強推垃圾徵費，局長黃錦星更成為眾矢之的，曾有議員狠批黃呢幾年負責推動垃圾徵費，但就淨係去立法會開過一次會，鬧爆黃白(豆)人工；又有議員話佢冇充分吸納議員意見作出修改，對法案感到不滿。近日更有不少環保團體，向立法會垃圾徵費條例草案委員會主席馬逢國發聯署信，要求重啟草案委員會。馬逢國則表示，是否重啟審議嘅主導權喺政府及內會手上咁話。
至於禁止電子煙草案同樣係爭拗不斷，以往法案委員會審議時議員都各持己見，搞到審議工作幾無寸進，就算開咗近十次會議亦告無疾而終，唔少議員對負責有關法案嘅食物及衞生局局長陳肇始頗有意見。
修訂入境條例草案 改善聲請審核
據了解，如果四條草案能夠翻生，需要由零開始，重組法案委員會去審議，屆時要由報名加入、選舉主席到逐條審議等由頭嚟一次。不過，重組法案委員會門檻不高，只要有議員要求成立法案委員會，再有三名議員加入就得。但就算呢啲法案復活，都仍然存在好大爭議，能否做到仍屬未知之數。
除此之外，本年度立法議程亦已出爐，政府計劃向立法會提交二十條條例草案，其中以財經事務及庫務局佔最多，共有五條，其次分別為運輸及房屋局和勞工及福利局，各佔四條和三條。值得注意嘅係，由保安局負責嘅入境（修訂）條例草案修訂《入境條例》（第115章）亦是名單之一，藉此改善免遣返聲請的審核程序；另外政府就窺淫罪立法，遭人批評拖延十多年，今次刑事罪行（修訂）條例草案條文修訂《刑事罪行條例》（第200章）亦榜上有名。