廚師阿華一路按摩前臂，一路喃喃自語：「做咩今日隻手咁痛嘅？」收銀員阿美說：「阿華，隻手做咩呀？無事嘛？」阿華回答：「無呀，今日都係好似平時咁，切吓肉，炒吓菜咋嘛，不過唔知點解，今日隻手有啲痛。」
經理光哥聽到就話：「有機會係上肢肌肉筋骨勞損喎！」阿華大驚：「吓？勞損？我都係做番平時嘅嘢咋喎，都無特別嘢做過！」光哥解釋：「唔使做咩特別嘢，只要你工作需要經常用力，而且要進行頻繁又重複性嘅動作，就有機會引起上肢肌肉筋骨勞損啦。」光哥又補充：「阿華你平時成日要切食物，前臂同手腕已經需要重複做同一樣嘅動作。你炒菜時，都要經常急促同重複去拋鑊，都可引起肌肉筋骨勞損。」
阿美問：「吓！唔通叫阿華唔好入廚房，跟我做收銀？」光哥回答：「咁又唔使，其實要預防肌肉筋骨勞損，在處理各類唔同工作時可依照一啲原則，首先避免長時間進行急促及重複嘅動作；開工時採用正確自然嘅工作姿勢，例如避免手腕屈曲、手臂過度伸展；減低工作時所使用嘅力度；同埋使用合適嘅工具及設備。」
光哥繼續說：「需要切肉嘅時候，你可以利用切肉機或者碎肉機去減少用人手，又或者炒菜嘅時候，用番隻細啲同輕啲嘅鑊，咁咪可以減輕重量囉。你又可以利用吓爐頭或者爐架去承托隻鑊減少用力，咁咪可以減低受傷風險。仲有你自己都要有足夠休息，以免積聚疲勞。得閒就利用休息時間嚟做啲伸展運動去鬆弛肌肉筋骨。有咩唔妥就快去請教醫生嘅專業意見呀！」
職業安全健康局
www.oshc.org.hk