選舉管理委員會前日發表二○二○年立法會選舉報告書，當中指境外投票涉及重大嘅選舉政策考慮，政府應就政策層面同法律運作作出研究。有消息指政府正草擬修例，容許住喺內地嘅香港永久性居民喺境外投票，同埋會引入「關愛隊」，計劃下個月提交立法會首讀，並爭取於明年選舉落實。
有消息指政府正草擬修例，容許住喺內地嘅香港永久性居民喺境外投票，並會喺短期內會提交立法會首讀。據了解，政府唔會更改選民「通常在香港居住」嘅要求，修例後會容許喺內地設票站，票站數量待定。至於選務人員就會由香港派去，但維持票站秩序就可能要內地執法機關負責。
為趕及明年立法會換屆選舉中實施境外投票，當局希望明年年初通過修例，提交立法會前就唔會有大型公眾諮詢。
喺防止選舉舞弊方面，目前《選舉（舞弊及非法行為）條例》嘅適用範圍已涵蓋香港以外嘅地方，市民若對選舉有投訴，可以照樣向廉政公署報案要求調查。
另外，消息指當局亦會為票站引入「關愛隊」，讓七十歲或以上長者、孕婦同傷殘人士優先投票。