政情：拒戴安全帶冇響號 田北辰轟運署漏招
部分公共交通工具已配備安全帶，而根據《道路使用守則》，如公共小巴已裝有安全帶，乘客就必須佩戴。議員田北辰（田二少）前日就拍片批評運輸署做一半唔做一半，事關部分小巴設有顯示屏，如果乘客冇佩戴安全帶，顯示屏就只會着紅燈提醒，之後就要靠司機勸喻。不過，佢話有時齋靠勸喻都未必有用，最後惟有照樣開車喇！
部分人「睇死」司機會照開車
田二少喺社交平台上載影片，佢喺片段中扮演「超級麻煩乘客」，多次遭到司機勸喻後先肯佩戴安全帶。充當反面教材後，田二少就提醒市民，其實有安全帶就需要佩戴，希望唔好難為司機，否則出咗事都唔知邊個負責。不過，佢又話顯示屏形同虛設，因為部分乘客會「睇死」司機會照樣開車，而無視顯示屏上嘅紅燈囉。
點解決？佢就建議運輸署為顯示屏加裝警號，倘若有人唔佩戴，車內就會有警告聲嘈到其他乘客，希望藉此逼唔聽話嘅市民戴番安全帶喎。田二少話運輸署都同意試一試，但佢都唔希望動用「最後方案」，一來經小巴營運商抗拒；二來佢話司機都唔想捲入漩渦、成為執法者喎。