中環出更：培養科研興趣 張澤松為仔女製造問題
現今科技日新月異，科技同教育融合亦成為一股潮流。卓妮早前去咗生產力促進局嘅「科技與技術教育」嘉年華，育有一對仔女嘅香港科技創新教育聯盟主席張澤松，喺屋企都會實行創新教育，甚至幫仔女揀學校嗰陣，都會考慮學校相關嘅教育配套添。
張澤松話依家嘅小朋友好幸福，有機會接觸唔同嘅科技產品，而佢就會為仔女「製造問題」，藉此講解科技嘅應用，例如同佢哋玩積木時會刻意少咗一件組件，跟住就趁機引導仔女認識三維打印技術，將失去嘅組件打印番出嚟。張澤松又指自己嘅童年時代，都對科技懷有濃厚興趣，仲會自己拆開「Walkman」同收音機研究，好彩最後都砌得番，但音質就大不如前喇。佢仲話預咗有一日會畀仔女拆開佢啲器材研究添啊！
生產力促進局總裁畢堅文，都話自己童年時代有試過拆開收音機研究發聲原理，不過佢嘅下場，就係畀媽媽發現並招來責難。畢話自己細個好百厭，特別係當時讀男校，冇乜嘢玩仲會向同學仔掟水彈添。主席林宣武就好羨慕時下嘅小朋友有咁多新玩意。佢話自己以前覺得讀書好悶，更會將教科書掉落街，而媽媽嘅應對策略，就係每本書買足三本，令到林宣武只有投降認輸。佢憶起以前啲小朋友學習嘅課餘興趣，多數都係傳統嘅琴棋書畫，有時利用雪條棍發揮小宇宙、砌吓積木已經好開心。
潘婷婷細個解剖過曱甴
創新科技署署長潘婷婷話以前讀書都係填鴨式教育，死記硬背以應付考試，但覺得如果可以落手落腳接觸唔同嘅事物，一定比起攞住本書更加深刻。潘婷婷以前讀理科，佢話記得有次考試要解剖曱甴，之後要將內臟釘喺板上作標記，而嗰陣班房開住風扇，竟然吹走咗細小嘅曱甴內臟，惟有無奈交卷，呢啲課堂往事潘婷婷到依家都記憶猶新啊。
卓妮