政府打擊違例同危險招牌不力，仲曾經畀審計署炮轟過，於是喺舊年嘅施政報告提出一系列嘅措施，屋宇署仲話會引入人工智能、大數據同3D空間圖像等新科技去加強執法，但一年過後仍然冇人承包，危險招牌仍然通街都係，原來係「大隻講」。幾時批出合約？屋宇署話希望今年內。話時話，呢啲危險招牌係都市炸彈，隨時搞出人命，呢啲意外一次都嫌多，署長余德祥唔係喺度等運到呀？若果今年又冇人承包，又拖到幾時呀？
