政情：業界嘆中醫藥欠推廣 本地生乏支援
政府喺舊年成立咗五億元專項基金，以促進香港中醫藥發展。有政黨尋日舉辦有關粵港澳中醫藥發展嘅圓桌會議，中醫藥界批評政府對中醫推廣不力，亦都唔採用中藥抗疫，就連本地大學中醫學生嘅實習培訓支援都不足。
促建中醫藥發展局
香港註冊中醫學會會長陳永光指香港本地大學中醫藥畢業生每年都係得六十至七十人，但香港學生返內地讀中醫每年就有幾百人。佢話十八區中醫診所本身設立職位畀香港學生實習三年，但依家規例有變，即使係內地返嚟嘅香港學生都可以喺十八區中醫診所實習，變相削弱咗香港學生嘅資源。佢又話要為實習項目增加名額，亦都要提供更多渠道畀香港畢業生去內地接受培訓同執業。
九龍總商會理事長李鳳翔認為推廣中醫藥嘅責任喺政府身上，既然有青年事務委員會處理青年問題，有金融發展局符合想賺錢嘅中年人需要，而老年人多病痛需要睇醫生，反問政府又點解唔設立一個中醫藥發展局呢？佢認為若有中醫藥發展局，可以畀政府動力，有多啲精神發展中藥。
香港大學名譽教授、醫管局前行政總裁黃譚智媛認為現時地區康健中心缺乏中醫，淨係得護士，指即使民間對中醫藥發展有建議都唔夠，政府都要幫手提供資金同政策。