中環出更：斥港府減碳一味拖 林超英劈炮
政府話要推動環保，仲喺環境局可持續發展委員會下成立咗「長遠減碳策略支援小組」，但近日爆出天文台前台長林超英已辭任小組召集人。佢尋日回應查詢時話難以理解局方點解一直拖延工作，而小組成立近三年只開過三次會，僅約十個鐘，由於佢難以接受好似交功課咁完成整項工作，所以早前劈炮唔撈。
事緣，環境局喺二○一八年委託可持續發展委員會，就制訂應對未來氣候變化嘅策略，當中包括減少碳排放嘅措施，進行公眾諮詢，當時仲預計要喺上年七月提交政策建議畀局方。點知成個諮詢活動拖到上年六月先展開，至今仲未公開有關嘅報告。
林超英話成個諮詢同委員討論程序一拖再拖，相信局方唔夠時間，為咗交功課畀中央，或已提交未有納入公眾意見嘅建議；而小組委員喺諮詢完結之後，更要多番要求先睇到民間團體提供嘅建議。
3年開得10個鐘會
最離譜嘅莫過於小組成立咗近三年，僅分別喺小組成立時、公眾諮詢開始前同今年六月開過會，總會議時間得十個鐘左右。林坦言作為召集人冇辦法為小組委員爭取到積極、有深度嘅政策研究，加上局方經常唔接受一班委員提出嘅意見，又對於二○五○年達成零排放嘅願景「擰晒頭」，所以佢最後都頂唔順，決定劈炮唔撈。政府有幾大決心減碳？大家睇到喇！
卓妮