中環出更：留港唔怕悶 鄧鉅明行山讚香港靚景
新冠肺炎疫情爆發至今，大家差唔多一年時間冇離開過香港去旅行，近期就有唔少酒店推出宅旅遊（Staycation）優惠，畀住客住番晚酒店，過吓旅行癮。太子珠寶鐘錶集團主席鄧鉅明話已過咗同朋友開Party嘅年紀，都唔會去酒店宅旅遊喇！不過佢就行多咗山，先發現原來香港係咁靚o架！
鄧鉅明話依家嘅生活主要留喺屋企陪老婆，但一個星期會同朋友行一次山，有成十幾個朋友一齊行，非常熱鬧。佢話行山會帶支行山杖，但唔係用嚟平衡借力，而係因為行山路線成日都有野生動物出現，有支行山杖防吓身，啲野生動物唔會襲擊自己嘛！佢又講笑話同朋友會行山前食嘢，行完之後再食一餐勁嘅，咁先係最好嘅減肥方法喎。佢最近就搭船去咗橋咀島玩，諗起好耐都冇搭船喇，不禁懷念起年輕嘅時光添！
唔單止酒店有宅旅遊，最近仲有航空公司推出環繞香港嘅飛行體驗，但香港足球總會主席貝鈞奇就話喺香港飛都冇用啦，都頂唔到旅行癮嘅。
貝鈞奇：在家千日好
貝就話後生嗰陣好期待出去玩，成日去行山，有得去主題樂園會好興奮，不過可能因為人大咗，經歷多咗，所以依家佢就覺得在家千日好，一於唔使搞咁多嘢啦，始終都係屋企最舒服喎。
卓妮又撞到香港足球總會前主席梁孔德，問到佢有冇出去玩，佢就話本身都好鍾意周圍去o架，但最近就冇去玩喇，因為早前整親隻左腳，做咗手術，依家仲喺「修養」當中，但已經好番好多啦！佢仲話啲仔女同孫仔有去遊船河，佢就等好番啲先再諗去邊玩啦！
卓妮